Ամերիկայի նախկին առաջնորդները՝ 42-րդ նախագահ Բիլ Քլինթոնը, 43-րդ նախագահ Ջորջ Բուշը և 44-րդ նախագահ Բարաք Օբաման, չեն մասնակցի Դոնալդ Թրամփի երդմնակալության ընթրիքին, որը տեղի կունենա հունվարի 20-ին: Այս մասին չորեքշաբթի հայտնել է NBC հեռուստատեսությունը՝ վկայակոչելով աղբյուրներին։
Նրանց խոսքով՝ Օբաման ու Քլինթոնն արդեն ստացել են ընթրիքի հրավերներ, սակայն չեն ծրագրում մասնակցել դրան։ Հրավեր է տրվել նախկին առաջին տիկին և նախկին պետքարտուղար Հիլարի Քլինթոնին, սակայն նա նույնպես հրաժարվել է մասնակցել միջոցառմանը։ Բուշ կրտսերի ներկայացուցիչները NBC-ին հայտնել են, որ տեղյակ չեն եղել նրա կողմից հրավերի ստացման մասին:
Այնուամենայնիվ, բոլոր երեք նախկին նախագահներն էլ հաջորդ երկուշաբթի կմասնակցեն Թրամփի երդման արարողությանը, հաղորդում է NBC-ն։ Սովորաբար, պետության նոր ղեկավարի երդմնակալության ելույթից հետո Վաշինգտոնից հեռանում է նախագահը, որի լիազորություններն ավարտվել են։
