Ղազախստանի իշխանություններն արգելել են ոչ ռեզիդենտներին 12 ամսից ավելի գործողության ժամկետով բանկային քարտերի տրամադրումը։ Սահմանափակումը չի ազդի ներդրողների, գործարարների և դիվանագետների վրա, և այն չի վերաբերում արդեն իսկ թողարկված քարտերին։
Euromedia24.com-ի փոխանցմամբ՝ինչպես պարզաբանել է Ղազախստանի ֆինանսական շուկայի կարգավորման և զարգացման գործակալությունը, սահմանափակող միջոցն ընդունվել է «նվազագույնի հասցնելու բանկային ծառայություններից օգտվելու ռիսկերը թմրամիջոցների անօրինական շրջանառության և թվային ակտիվների ոլորտում»։
Ղազախստանը ռուսների համար ամենահայտնի ուղղություններից է, ովքեր որոշել են լքել իրենց երկիրը Ուկրաինայում լայնածավալ պատերազմի սկսվելուց և այսպես կոչված մասնակի մոբիլիզացիայի մասին Վլադիմիր Պուտինի հայտարարությունից հետո։
Ղազախստանի կառավարության տվյալներով՝ 2022-ից 2024 թվականներին Ռուսաստանի գրեթե 695 հազար քաղաքացիներ տեղական բանկերից քարտ են ստացել, իսկ հանրապետական ներքին գործերի նախարարության տվյալներով՝ 2024 թվականին 233 հազար ռուսաստանցիներ ստացել են Ղազախստանի անձնական պետական համարանիշ: Հայտնի չէ, թե իրականում քանի ռուս է ապրում Ղազախստանում։
