ՀՀ նախկին ոստիկանապետ Վլադիմիր Գասպարյանի թիկնազորի նախկին պետ Արշակ Հակոբյանը (Վովայի Արշակ) վերդիկտով արդարացվել է։ Այս մասին «Հրապարակ»-ին հայտնում են Հակակոռուպցիոն դատարանից, որտեղ էլ քննվել է նրա վերաբերյալ քրեական գործը։
Վերջնական դատական ակտը հրապարակվելու է հունվարի 31-ին, մինչ այդ լինելու են դատալսումներ։
Գլխավոր դատախազությունից այս որոշման վերաբերյալ մեզ փոխանցում են․ «Կայացված դատական ակտի վերաբերյալ, այն ստանալուց հետո, վերաքննիչ բողոք ենք ներկայացնելու»։
Հիշեցնենք, որ Արշակ Հակոբյանին մեղադրանք է առաջադրվել ՀՀ քրեական օրենսգրքի 314.3-րդ հոդվածի 2-րդ մասով նախատեսված /երկու դրվագ/ հայտարարագրման ենթակա առանձնապես խոշոր չափերով գույքը դիտավորությամբ թաքցնելու և ՀՀ քրեական օրենսգրքի 190-րդ հոդվածի 3-րդ մասի 1-ին և 3-րդ կետերով նախատեսված հանցավոր ճանապարհով ստացված առանձնապես խոշոր չափերով գույքի օրինականացման հատկանիշներով։
