Վրաստանը կարող է զբաղեցնել իր տեղը «3+3» ձևաչափով տարածաշրջանային համագործակցության հարթակում: Այս մասին հայտարարել է Ռուսաստանի արտաքին գործերի նախարար Սերգեյ Լավրովը 2024 թվականին Ռուսաստանի դիվանագիտության արդյունքներին նվիրված մամուլի ասուլիսում։
«Մենք ակտիվորեն պաշտպանել ենք Իլհամ Ալիևի նախաձեռնությունը «3+3» մեխանիզմի ստեղծման մասին՝ երեք հարավկովկասյան երկրները և նրանց երեք հարևանները՝ Ադրբեջան, Հայաստան, Վրաստան - Ռուսաստան, Թուրքիա, Իրան։ Այն պաշտպանել է նաև Թուրքիայի նախագահ Էրդողանը:
Արդեն կայացել են առաջին շփումները, մեր վրացի հարևանները դեռ չեն զբաղեցնում իրենց համար հատկացված աթոռը, բայց աթոռն այն սեղանի շուրջ, որտեղ մենք հավաքվում ենք՝ քննարկելու տարածաշրջանի խնդիրները, միշտ հասանելի է մնում նրանց համար», - Լավրովի խոսքերն է մեջբերում ՏԱՍՍ գործակալությունը։
Նախարարի կարծիքով՝ «3+3» ձևաչափն ավելի օբյեկտիվ է, քան Եվրամիության մասնակցությամբ ձևաչափը։
«Քիչ առաջ լսեցի, որ Հայաստանն ու Ադրբեջանն արդեն համաձայնության են եկել խաղաղության պայմանագրի շուրջ: Հասկանալի է՝ երկու հարց է մնում՝ դժվար է դրանք ինչ-որ կերպ շրջանցել:
Անհրաժեշտ է վճռել՝ կա՛մ «այո», կա՛մ «ոչ»:
Հենց այդ պահին Եվրահանձնաժողովը, Եվրամիությունը սկսեցին ասել.
«Ահա մենք հիմա կգանք, ձեզ կօգնենք»: Դա Ադրբեջանի և Հայաստանի սուվերեն որոշումն է՝ որտեղ ստորագրել փաստաթուղթը, երբ այն համաձայնեցվի, բայց Բրյուսելի և Վաշինգտոնի ձգտումը նույնպես ինչ-որ կերպ ցույց տալու համար, որ այդ իրենք են ամեն ինչ արել, ևս մեկ անգամ վկայում է, որ…. ամեն տեղ ցանկանում են ցույց տալ, որ իրենք են տերը», - ասել է Լավրովը։
