Պաղեստինյան ՀԱՄԱՍ արմատական շարժման մարտական թևի՝ «Իզեդին ալ Քասամի բրիգադներ» խմբավորման ղեկավար Մուհամեդ Սինվարը դարձել է Գազայի հատվածում ՀԱՄԱՍ-ի նոր ղեկավարը, այս մասին հաղորդել է The Wall Street Journal թերթը՝ վկայակոչելով աղբյուրների։
Ըստ նրանց՝ Մուհամեդ Սինվարը ՀԱՄԱՍ-ի՝ 2024 թվականի հոկտեմբերին զոհված առաջնորդ Յահյա Սինվարի կրտսեր եղբայրն է։ Շարժման նոր ղեկավարն ակտիվ ջանքեր է գործադրում խմբավորման վերականգնման համար, քանի որ դրա մարտական հնարավորությունները լրջորեն վնասվել են 2023 թվականի հոկտեմբերից Գազայի հատվածում Իսրայելի ռազմական գործողությունների հետևանքով:
Ըստ հրատարակության զրուցակիցների՝ Յահյա Սինվարի սպանությունից հետո ՀԱՄԱՍ-ի՝ Կատարում գործող քաղաքական գրասենյակը նոր ղեկավար չի ընտրել և որոշել է անցնել հավաքական ղեկավարման։ Գազայի հատվածում խմբավորման զինյալները հրաժարվել են ենթարկվել գրասենյակին և այժմ «գործում են ինքնավար»՝ Մուհամեդ Սինվարի գլխավորությամբ։ Նշվում է, որ նա մտերիմ է եղել շարժման զինված թևի ղեկավար Մուհամմեդ ադ Դեյֆի հետ, որը զոհվել է 2024 թվականի հուլիսին Իսրայելի հարվածի հետևանքով։Պարբերականի տվյալներով՝ Մուհամեդ Սինվարը վաղուց է ընդունվել ՀԱՄԱՍ-ի շարքերը, այժմ նա մոտ 50 տարեկան է:
Նրա հայացքների վրա մեծ ազդեցություն է ունեցել ավագ եղբոր գործունեությունը։ Ինչպես հայտնել են թերթի աղբյուրները, Մուհամեդ Սինվարին հաջողվել է երկար ժամանակ թաքնվել Իսրայելի հատուկ ծառայություններից, ինչի համար նա ստացել է Ստվեր մականունը։ Իսրայելի իշխանությունները կարծում են, որ Մուհամեդ Սինվարը մասնակից է եղել 2023 թ. հոկտեմբերի 7-ին հրեական պետության վրա ՀԱՄԱՍ-ի հարձակման և 2006 թվականին իսրայելցի զինծառայող Գիլադ Շալիթի առևանգման կազմակերպմանը: 2011 թվականին Շալիթի դիմաց ՀԱՄԱՍ-ի 1027 կողմնակիցներ իսրայելական բանտերից վերադարձվել էին Գազայի հատված. նրանց թվում է եղել նաև Մուհամեդ Սինվարի ավագ եղբայր Յահյան:
