Կանադայի վարչապետ Ջասթին Թրյուդոն, ով ավելի վաղ հայտարարել էր հրաժարական տալու մտադրության մասին, եղել է ԱՄՆ-ի «հավատարիմ ընկերը»։ Այս մասին երկուշաբթի օրը լրագրողների համար հերթական ճեպազրույցում ասել է Սպիտակ տան մամուլի քարտուղար Կարին Ժան Պիերը։
«Վարչապետ Թրյուդոն եղել է Միացյալ Նահանգների հավատարիմ ընկերը Կանադայի կառավարության ղեկին եղած տասնամյակի ընթացքում: Որպես մերձավոր դաշնակիցներ, հարևաններ և G7-ի անդամներ` մենք սերտորեն համագործակցել ենք մի շարք հարցերի շուրջ, որոնց առջև ծառացած են մեր երկրները և աշխարհը»,- ասել է նա: Նրա խոսքով՝ ԱՄՆ նախագահ Ջո Բայդենը երախտապարտ է Թրյուդոյին գործընկերության համար։
«Մենք աջակցում ենք վարչապետին և Կանադայի ժողովրդին իշխող Լիբերալ կուսակցության նոր առաջնորդի ընտրության և նոր կառավարության ձևավորման հարցում», - ասել է Կարին Ժան Պիերը:Սպիտակ տան մամուլի քարտուղարին խնդրել են նաև մեկնաբանել ԱՄՆ նորընտիր նախագահ Դոնալդ Թրամփի հայտարարությունը Truth Social-ում, որ կանադացիներից շատերը կողմ են, որ իրենց երկիրը դառնա ԱՄՆ-ի 51-րդ նահանգը։
«Ես չեմ պատրաստվում մեկնաբանել այն ամենը, ինչ ասելու է ընտրված նախագահը։ Ինչպես գիտենք, այս վարչակազմին մնացել է երկու շաբաթ։ Նախագահ [Ջո Բայդենը] պատրաստվում է կենտրոնանալ այն ամենի վրա, ինչ մենք անում ենք այսօր։ Ես պարզապես չեմ պատրաստվում մեկնաբանել այն ամենը, ինչ ասում է նորընտիր նախագահը»,- ասել է Կարին Ժան Պիեռը:
