Հունվարի 6-ին Հյուսիսային Կորեան արձակեց նորագույն հիպերձայնային բալիստիկ հրթիռը։ Այս մասին հայտնել է Կորեայի կենտրոնական լրատվական գործակալությունը (KCNA)։ Ընդգծվում է, որ արձակմանն անձամբ են հետևել Կիմ Չեն Ընը, ինչպես նաև երկրի ռազմական ղեկավարությունը։
Մեկնաբանելով հաջող արձակումը, ԿԺԴՀ ղեկավարն ասել է, որ նոր հիպերձայնային հրթիռի ստեղծման նպատակը ինքնապաշտպանությունն է, այլ ոչ թե հարձակողական գաղափարները։ Միևնույն ժամանակ, նա ընդգծել է, որ ԿԺԴՀ-ի նոր հիպերձայնային հրթիռը «կարող է արդյունավետորեն ներթափանցել աշխարհի ցանկացած հակահրթիռային պաշտպանության համակարգ»:
Նոր հիպերձայնային հրթիռը, ըստ Կիմ Չեն Ընի, նախատեսված է Ասիա-խաղաղօվկիանոսյան տարածաշրջանի ցանկացած հակառակորդին հուսալիորեն զսպելու համար, որոնք սպառնալիք են ներկայացնում ԿԺԴՀ-ի անվտանգության համար: «Համաշխարհային մասշտաբով միայն մի քանի երկրներ ունեն նման սպառազինության համակարգ»,-ավելացրել է Կիմ Չեն Ընը:
Կիմ Չեն Ընը նաև վստահություն է հայտնել, որ փորձնական արձակումը «ցուցադրել է ԿԺԴՀ-ի անսպառ պաշտպանական տեխնոլոգիաների ներուժը, որը կարող է արձագանքել ցանկացած սպառնալիքի, ինչպես նաև դրանց զարգացման տեմպերը»:
